¡Rinimi, Llacta!

¡Rinimi, Llagta, rinimi

may carupi causangapa;

Mana quiquin Llagtashina

cuyanguichu runataca!

Huarmi, churita saquishpa,

ayllucunata cungashpa,

Cay tuta, quilla llugshigpi,

ñanta japinimi, Llagta.

Anga millayta ricushpa,

imashinami urpi huahua,

urcuta tigrash, chingarin,

cacapi miticungapa.

Chasnami cuyayla rini,

supay aputa manchashpa

chasnami, mana jaycapi

ricuringapa, chingasha.

Chayug runa cashca quipa,

huagchami cani cunanca;

paymi callaymanta quichun

jatun Apunchi cushcata.

Ñuca huasi paypag huasi;

ñuca allpapish paypag allpa.

¡Huyrappi rig ugshashina

causacunimi, Llagtalla!

Ushi huahuapish huañunmi,

paypag ucupi huacashpa.

¡Ushita quichuna randi;

shunguta quichunman carca!...

¡Alau! Nishpa, cungurishpa,

maquicunata churashpa,

quishpichigpa ñaupagpimi

huacami runa cashcata.

Pay Apunchicha ricunga;

paychari caita munarca;

payhuanmi saquispa rini

ishcay curipiticaca.

Ichapish, Pay cutichigpi,

muyumusha carumanta,

Huarmihuanpish, churihuanpish,

miticushpa callpangapa.

Maycan tuta, chaupi tuta,

sachata catish, chayashpa,

huiquijunda ugllashachari

cunan jichuscacunata.

¡Icha quimsandi llugshishun;

quimsandilla causangapa,

mana pipish tarigrina

urcuhuashapi chogllashpa!

Huañunatami llaquini

chican llagtapi, sapalla,

manapish cayman cutishpa,

manarag ishcayta ugllashpa.

¿Pichari, chasna huañugpi,

<Huañunmi> nishpa huillanga?

Ishcaya ñuca cutigta

shuyangachari shuyaylla...

¡Chayca ña quilla shamunmi,

payuchaupita quimllashpa!

¡Chayca jatarish purina

llaquipish chayana cashca!...

Rinimi, Llacata rinimi

may carupi huañungapa;

¡Mana quiquin llagtashina

cuyanguichu runataca.!

LC